ژیاننامەی پیاوچاک و کەسایەتیی ئایینیی ناوچەی برادۆست مەلا ملۆ بەرخال،ناسراو بە مەلا ئیبراهیم

————————-

ژیانی مرۆڤە گەورە و نیشتمانپەروەرەکان، وەک کتێبێکی کراوە وایە کە پڕە لە وانەی ئارامگری، خواپەرستی و خزمەتکردنی ئایین و کۆمەڵگە، یەکێک لەو ئەستێرە درەوشاوانەی کە تەمەنی خۆی لە پێناو ڕەزامەندیی خوا و خزمەتکردنی خەڵکدا بەخشیوە، زانای ئایینی و پیاوی خواناس، باوکی ئازیزم (مەڵا ملۆ بەرخال)ـە، لێرەدا بەندە وەک کوڕێکی ئەو کورتەیەک لە ژیاننامەی دوو رو درێژی ئەم زاتە گەورەیە دەخەمە بەرچاوی خوێنەرانی بەرێزو خۆشەویست .

بەڕاستی من هەرگیز ناتوانم قەرەبووی ئەو ماندووبوون و شەونخونییە بکەمەوە کە باوکی ئازیزم بۆ منی کێشاوە تاوەکو ببمە مەلایەکی چاک و خزمەت بە ئایینی پیرۆزی ئیسلام بکەم،ئاوات و هیوای گەورەی باوکم هەمیشە ئەوە بوو کە من بخوێنم و واز لە خوێندنی زانستە ئایینییەکان نەهێنم،سوپاس بۆ خوای گەورە کە دوعاکانی جەنابی باوکمی گیرا کرد؛ پێش ئەوەی لەم دنیایە ماڵاوایی لەیەکتر بکەین، ئەو بە چاوی خۆی بەرهەمی ماندووبوونی خۆی بینی، کاتێک منی لەو پێگەیەدا بینی، زۆر سوپاسی خوای کرد وفەرمووی، کوڕم، ئەوەی لە خودا داوام دەکرد پێش مردنم، خوای گەورە بۆی هێنامە دی، ئەویش ئەوە بوو کە تۆ ببیتە مەلایەک و خزمەتی ئیسلام بکەیت، بەڕاستی باوکم لە خۆشیدا دەگریا کاتێک دەیبینی من بڕوانامە و مۆڵەتی مەلایەتی بەدەست دەهێنم.

ناوی تەواوی باوکم (مەڵا ملۆ بەرخال ئەحمەد مامەد)ـە،لەنێو خەڵکدا زیاتر بە (مەلا ئیبراهیم، مەلا ملۆ، یان سۆفی ملۆ) ناسراوە،ئەو سەر بە هۆزی ڕەسەنی برادۆستە و لە ساڵی (١٩٤٦) لە گوندی (بەڵسنان)ی سەر بە ناحیەی سیدەکان لەدایک بووە،دایکی ناوی (گەوهەر) کچی حەمەد ئەحمەد شێخە بوو، کە خەڵکی گوندی (شوشنە)ی برادۆستە.

باوکم هەر لە تەمەنی منداڵییەوە سێبەری باوکی لەدەست دەدات و هەتیو دەکەوێت، بەڵام خوای گەورە دەرگایەکی گەورەی ڕەحمەتی بۆ دەکاتەوە و تەواوی ژیانی لاوێتی و پەروەردەیی لە (تەکیەی لۆلان)لە خزمەت زانا و عاریفی ناودار، جەنابی مەرحوم (شێخ ڕەشیدی لۆلان) بەسەر دەبات.

بەهۆی ئەوەی باوکم بێباوک بوو، جەنابی شێخ سۆز و خۆشەویستییەکی زۆر تایبەتی بۆی هەبووە و وەک باوکێک چاودێری کردووە؛ جلوبەرگ و پارە و پێداویستییەکانی بۆ دابین کردووە و خستوویەتە بەرخوێندنی قورئانی پیرۆز،ئەم سۆزەی جەنابی شێخ کاریگەرییەکی قووڵی لەسەر دەروونی باوکم جێهێشتووە؛ تا ئەمڕۆش کە تەمەنی موبارەکی هەشتاکانی تێپەڕاندووە، هەرکاتێک باسی جەنابی شێخ ڕەشیدی مەرحوم دەکرێت،لەبەر خۆشە ویستی و وەفاداری، خۆی پێ ناگیرێت و فرمێسک بە چاوەکانیدا دێتە خوارەوە و بەردەوام باسی کەرامەتەکانی شێخ بۆ ئێمە و دەوروبەری دەکات.

قۆناغی فەقێیەتی و زانستە ئایینییەکان:

باوکم بە عەشق و خولیایەکی زۆرەوە خۆی دەداتە بەر خوێندنی هەندێک لە زانستە شەرعییەکان و قورئانی پیرۆز،لەلای کۆمەڵێک زانای بەرێزی ئەوکات زانستی وەرگرتووە،لەوانە:

1-مەڵا ئەحمەد خانمێ (کانیەرەشی برادۆستی).

2-مەڵا قادر میرزا مام گەردییە و لە بنەڕەتدا سورچی بووە.

3- مامۆستا مەڵا محەمەد هەرکی (ئیمامی بەڕێزی جەنابی شێخ ڕەشیدی لۆلانی بووە).

4- مەڵا ئیبراهیم سمایلی (لە هۆزی هەرکی).